NCU NAM TXUJSA TU LE NPAU SUAV HAB NAM LUB KUA MUAG HLUB

Vim muaj nam hab muaj txiv, nwg txha le muaj peb txhua tug. Yog le ntawd, nam hab txiv yog ob tug kws tseemceeb, muaj nuj nqes, hab yog ob tug kws peb yuav ncu nyob huv peb lubneej moog ib txhis.

Lawv le wikipedia lub website, nwg qha has tas kev ncu txug leej nam xub xub pib nyob rua tebchaws Greece ua ntej. Tom qaab nua ntau ntau lub tebchaws maam le pib muaj “Leej Nam Nub/Mother’s Day”, taabsis cov nub nwg sib txawv.

Amelikas, Aaskiv, hab Canada le “Leej Nam Nub” yog lub 5 hlis 13. Nyob Amelikas, Leej Nam Nub yog pib lug ntawm Julia Ward Howe xyoo 1870 kws yog ncu txug nwg nam nub; ces pib muab ua Leej Nam Nub thoob tebchaws Amelikas xyoo 1872 lug lawm.

Leej Nam Nub yog ib nub kws cov mivnyuas lug ncu txug leej nam txuj kev hlub, kev zoo, kev taab ncuab, hab lug ua leej nam tsaug. Kev ncu txug Leej Nam Nub yog kev has lug zoo hab ua tsaug rua leej nam, yuav ib tsob paaj rua leej nam, yuav ib yaam khoom rua leej nam, coj leej nam moog noj mov, losyog ua tej yaam kws zoo rua leej nam.

Muaj coob leej kuj ncu ntsoov ua leej nam tsaug hab ncu txug nwg txuj kev hlub thaus txug Leej Nam Nub lub sijhawm leej nam tseem nyob, taabsis muaj coob leej ncu txug leej nam txuj kev hlub thaus txug Leej Nam Nub tom qaab leej nam twb ncaim lawm.

Muaj ib tug ntxhais has tas txhua txhua zag txug Leej Nam Nub, nwg yuav ib yaam khoom rua nwg nam, nwg puag nwg nam, hab nwg has lug ua tsaug rua nwg nam tej kev hlub. Nwg nam yog nwg tug phoojywg zoo nyob huv nwg lubneej.

Muaj ib tug ntxhais ho has tas, lub sijhawm nwg nam nyob, nwg tsi muaj sijhawm has lug ua nwg nam tsaug txug nwg nam tej kev hlub, taabsis tom qaab nwg nam tuag tau ib xyoos lawm. Nub kws txug Leej Nam Nub, nwg maam pum txug nwg nam tej kev hlub, taabsis lig heev lawm kws nwg tsis tau has lug zoo ua tsaug rua nwg nam.

Yaav taag lug, peb Moob tsi muaj ib nub kws yog ncu txug Leej Nam Nub. Lawv le kuv tug kheej hab kuv pum peb Moob mas yeej tsi muaj kev has lug ua tsaug, has lug zoo, hab has lug qaab zib rua leej nam ntau.

Muaj ib tug ntxhais Moob ncu txug nwg nam txuj kev hlub hab kev zoo le nuav: “Thaus kuv yau, kuv nam pheej muab tej khoom qaab qaab rua kuv noj. Kuv pheej xaav tas yog vim le caag twb qaab qaab los nwg ho tsi xaav noj; ces nwg pheej muab rua kuv noj. Zag nuav kuv maam paub tas vim yog kuv nam hlub kuv, nwg txha muab rua kuv noj.”

Koj hab kuv, peb yog Moob, txug Leej Nam Nub/Mother’s Day, peb ncu txug peb nam txuj kev hlub le caag? Peb nam puas tseem muaj txujsa nyob losyog nwg twb ncaim peb lawm? Peb yuav tog txug thaus twg peb maam qha rua nwg has tas peb hlub nwg hab ua nwg tsaug?

Feem ntau, peb Moob, mas peb tog ca peb nam taag simneej, ces peb maam ua ib lub nteeg luj luj rua peb nam qha has tas peb hlub hab ncu txug nwg txuj kev hlub. Nwg kuj yog ib qho kws zoo kawg lawm.

Taabsis lub xuvtooj cua Moob nyob St. Paul has tas thaus cov tuabneeg Amelikas tuaj pum peb Moob ua tej lub nteeg luj luj rua peb nam hab peb txiv, puab has tas: “Peb Moob ua yog lawm, taabsis yuam kev sijhawm – Do the right thing, but at the wrong time.”

Lu luag nuav qha has tas yog vim le caag thaus peb nam hab txiv tseem muaj txujsa nyob peb ho tsi ua nwg tsaug losyog ua tej yaam zoo rua nwg, taabsis thaus taag txujsa lawm, nwg twb tsi nov lawm, peb maam ho ua zoo zoo rua nwg.

Has txug kuv tug kheej, nwg lig rua kuv heev lawm vim kuv nam twb ncaim kuv moog ib txhis tau 34 xyoos lawm. Nwg tsi muaj sijhawm rua kuv has lug zoo ua tsaug rua kuv nam, kuv yuav khoom qaab los kuv nam tsi noj lawm, hab kuv has tas kuv hlub kuv nam los nwg tsi nov lawm.

Qhov kws kuv ncu txug kuv nam nyob huv kuv moog ib txhis hab txug nub kws yog Leej Nam Nub, ces yog ncu kuv nam “txujsa tu zoo le kuv zaaj npau suav hab ncu nwg lub kua muag hlub kuv thaus nwg txujsa tu” lawm xwb.

Kuv nam mob mob, tsi zoo le, ces muaj ib nub kuv txawm ua ib zaaj npau suav has tas kuv txhais npaab saab laug tu nrho 3 zag rov lug txuas nkaus 3 zag los tsi tau le. Txug nub kuv nam yuav tso kuv tseg, kuv puag kuv nam huv kuv lub xub ndlag. Nwg ua 3 zag paa luj luj: zag 1, zag 2, ces zag 3, nwg txujsa tu nrho lawm.

Thaus nwg txujsa tu kag, nwg lug ob lub kua muag luj luj huv nwg qhov muag lug. Naj nub nuav ua rua kuv pheej xaav tas nwg ob lub kua muag yog qha tas nwg hlub kuv vim nwg tuag lawm ces kuv yuav txomnyem vim tsi muaj nam lug paab hab hlub kuv zoo le kws kuv tsi muaj txha npaab saab laug lawm.

Thaus kuv nam tso peb tseg lawm, kuv tug kwv, kuv tug muam, hab kuv txiv peb lubneej pib txomnyem heev tuaj. Kuv pib xyum ntxiv kuv tej khaub dluag, kuv pib lug kua muag, hab kuv maam paub txug tas zag nuav kuv tsi muaj txhais npaab saab laug zoo le kuv zaaj npau suav lawm.

Naj nub nua, txug Leej Nam Nub, kuv paub tas nwg lig heev lawm, kuv has lug rua kuv nam los nwg tsi nov lawm, taabsis kuv yuav thov ncu kuv nam tej kev hlub kuv, hab kuv yuav ncu kuv “Nam Txujsa Tu Le Npau Suav hab Lub Kua Muag Hlub” kuv moog ib txhis txug nub kuv ntsib nwg.