NTSES SALMON LUB NEEJ

Nyob rau hauv ntiaj teb no muaj ib hom ntses hu ua “Salmon”. Hom ntses no yog ib hom ntses nrhiav noj nyob rau hauv hiav txwv tabsis ua qe thiab daug menyuam nyob rau puag pem tej hau dejntws ntiav ntiav xwb, tsis ua qe thiab daug menyuam li lwm yam ntses hiav txwv. Tej kws txuj tshawb fawb txog ntses thiaj pom tias hom ntses Salmon muaj kev ua neej txawv thiab tsimnyog zoo muab qhia rau noob neej tibneeg tau kawm. Vim li no kuv thiaj muab piav rau hauv ntawv Xovxwm “Hmong Today” rau sawvdaws tau nyeem.

Nyob rau Amelikas teb thaum lub 7 hli (July) thiab lub 9 hlis (September) mas cov ntses Salmon no yuav sibtw nce nram hiav txwv tuaj mus rau tej dejntws. Lawv tuaj ua tsheej pab sibrub sibnias thiab sibtw ua luamdej nce toj. Thaum cov ntses nce dej tuaj coob li no mas kuj zoo saib kawg li. Tej ntu dej mas pom dej thiab ntses sib npaug zos, tej ntu mas ntses ntau dua dej, tej qhov dej kuj ntau dua ntses, nyob ntawm dej tob los ntiav. Yog tej dejntws muaj tsag siab, cov ntses Salmon no kuj yuav sibtw dhia kom nto thiab ua luamdej mus kom txog rau puag pem tej hauv dej uas ntiavv thiab muaj tej menyuam pas dej tuss, tsis muaj dej ntxhee ntsawj losis tsis muaj cua nplawm kom lub pas dej ntas taus li.

Thaum ib nkawm niam txiv ntses Salmon tuaj txog rau ntawm ib lub pas dej tuss thiab tsis ntas li hais saum no lawm, tus niam yuav nteg nws cov qe rau hauv lub pas dej ces tus txiv li mam los yuj thiab tso ib co kua los ywg cov qe ntses. Ua li ntawd tag mas ob niam txiv ntses kuj yuav cia li sawv ntsug thiab xuas nkawd ob tug kotw lij kiv, lij kiv ncig lees li ntawm kaum tawm zaus ces nkawd tuag. Nkawd cev nqaij yuav pob zuj zus thiab poob tog nrog cov pobtxha rau hauv lub pas dej. Cov tawv kuj muaj tej daim ntab rau saum nplaim dej.

Thaum cov qe ntses daug, cov menyuam ntses Salmon yuav ua luam dej zom zaws nrhiav noj. Lawv yuav mus noj mus kaws lawv niam lawv txiv cov nqaij thiab cov pobtxha uas poob tog rau hauv qab thu. Lawv noj lawv niam lawv txiv cov nqaij tag ces lawv kuj txawj noj kab, noj ntsaum thiab tej txiv hmab txiv ntoo uas poob rau hauv tej pas dej. Thaum lawv loj li ib ob nti lawm ces lawv kuj sibtw ua luamdej nqis hav thiab mus nyob rau hiav txwv raws li lawv niam lawv txiv lub neej. Rov txog caij ua qe, lawv li mam rov ua luamdej nce toj tuaj.

Lub sijhawm ntses Salmon ua luamdej nce toj no cov neeg Khab (Indian Tribes) uas ib txwm ua neej nyob teb chaws Amelikas kuj tsa koob tsheej ua kev lom zem nkaug ntses. Lawv yuav rauv taws, ntaus nruas, thiab dhia muascaum (seev cev). Ib leeg ib rab hmuv ntawm tes. Lawv ua li ntawd li ib ob hmos ces lawv li mam sibtw khiav mus rau nram hav dej ces lawv mam nkaug cov ntses coj los noj. Thaum lawv nkaug tau ntauu lawm, lawv kuj muab qha muab ziab thiab muab khaws cia tau noj rau thaum lub caij ntuj no.

Hom ntses Salmon no lub cev mas zoo li cov ntses dawb uas lus Lostsuas hu hais tias “Pas Nais”. Hom ntses no cov nqaij tuabb thiab thaum nyoos mas liab ploog xwb. Thaum muab hau, muab cub, muab ci tau mas cov nqaij daj rhuv, tsis dawb li lwm yam nqaij ntses. Thaum yus noj kuj qab tau txhim hniav nkawv, muaj ib tsos qab rog huv siab, thiab qhov tseemceeb tshaj mas cov nqaij tsis muaj tej menyuam pobtxha uas yuav ua rau yus ntshai noj. Yog yus muaj cawv haus ntxuag mas kuj noj haus tau tsau txaus siab kawg li.

Kwvtij neejtsa Hmoob, peb kev ua neej ces zoo li hom ntses Salmon lub neej. Tej laus niaj txhis piv txoj lus tias “Hwm ntuj thiaj tau ntuj ntoo, hwm niam hwm txiv thiaj tau zoo”. Tej no muaj tiag. Ua neej nyob, peb yuav noj tsis tau peb niam peb txiv tej nqaij tej pobtxha li cov menyuam ntses Salmon, tabsis cov menyuam twg txawj hwm lawv niam lawv txiv, lawv kujyuav tau koob tau hmoov zoo. Lawv lam ua los lam tau, lam hais los lam yog. Luag tooj yas ob cag kuj cia li tuaj txhawb tuaj nqa, uakom lawv cia li tsim txiaj, thiab muaj koob nto moo tuaj.

Tsis tas li ntawd, tej txhia niam txiv tuaj nyob teb chaws Amelikas kuj tseem npaj tau tej ntaub ntawv nyiaj tuav povhwm (Life Insurance) los daws lawv tej menyuam txoj kev txomnyem. Thaum lawv tas sim neej lawm, lawv tej metub menyuam kuj tau tej nyiaj nqi taubhau los pab lawv ua lawv lub neej. Vim li no thiaj piv tau tias peb niam peb txiv tej koob tej hmoov losis tej ntawv nyiaj tuav povhwm ces zoo nkaus li cov ntses Salmon tej nqaij tej pobtxha tso tseg cia los yug lawv tej me tub menyuam ntag tiag.

Tshaj ntawm ob yam saum no, peb cov Hmoob uas tuaj nyob teb chaws Amelikas thiab ho rov mus ncig xyuas tej teb chaws ntuj qub qab ces kuj muaj ib feem zoo li hom ntses Salmon lub neej thiab. Peb tuaj nyob rau teb chaws vam meej loj thiab dav zoo nkaus li hiav txwv, tabsis thaum twg txog lub caij noj tsiab pebcaug ces peb tseem nco peb Hmoob lub zos tojsiab, peb yuav npaj ntug npaj teb ua cuag li ntses Salmon dhia tsag. Sawvdaws yuav sibtw yuav pib dav hlau thiab caij dav hlau coobb sibrub sibnias mus kom rov txog peb li qub teb qub chaw. Thaum peb mus txog lawm, peb kuj yuav tsis tuag li tej niam txiv ntses Salmon kom tej menyuam tau peb li nqaij noj losis tau peb li txha kaws, tabsis peb mus txog lawm, peb tej nyiaj tej txiaj uas peb muab siv muas noj muas haus, kuj zoo nkaus li tej nqaij tej pobtxha uas cov niam txiv ntses Salmon tso tseg los yug lawv tej menyuam tibyam thiab. Zoo li no, kuv thiaj xav xaus zaj lus no tias kom sawvdaws nco ntsoov cawm tej menyuam hmob ntses xwv thiaj lawv thiaj li taug tau lawv niam lawv txiv tus neev taw lawm yav tom ntej.

Lus Cim: Tej lo lus sau tias “Ntiavv”, nyeem hais tias “ntiav ntiav”