TSABCAI “PATRIOT ACT” TSIS PUB HMOOB TUAJ RAU AMELIKAS

Txij thaum cov tibneeg phem, Terrors-Al Qaeda, tua Amelikas ob lub tsev lagluam World Trade Centers nyob New York thaum lub 9 hlis 11, 2001, uas tuag 3,000 tawm leej, Amelikas thiaj tau tsim ib tsabcai hu ua Patriot Act los mus tiv thaiv Amelikas lub tebchaws kom cov tibneeg phem ua tsis tau kev phem rau Amelikas ntxiv

Tsabcai no pib tsim muaj tom qab uas cov tibneeg phem tua ob lub tsev lagluam tag. Thaum lub 3 hlis 2, 2006, cov nomtswv nyob Xabnej (Senate) tau tawm suab pom zoo txais yuav tsabcai thiab thaum lub 3 hlis 7, 2006, cov nomtswv nyob Xabphas (House) tau pom zoo txais yuav thiab. Thawj Pwmtsav George W. Bush tau cim ntawvtes (signed) los mus ua ib tsabcai rau Amelikas thaum lub 3 hlis 9, 2006.

Tsabcai no yog tsim los mus tawm tsam cov tibneeg phem ua rog tubsab, terrorism, nyob hauv Amelikas thiab nyob lwm tebchaws kom lawv tsis txhob tsim tau kev kub ntxhov thiab tsis txhob tua tau tibneeg Amelikas.

Tsabcai Patriot Act no muaj tag nrho 10 tshooj li nram no thiab ib tshooj twg nws kuj tseem muaj ntau ntau tshooj me nyob rau hauv thiab.

• Tshooj 1: Tawm tsam tiv thaiv txog kev uas cov tibneeg phem tsim kev kub ntxhov nyob hauv Amelikas tebchaws.

• Tshooj 2: Tso cai pub rau cov nomtswv saib kev ruaj nreg txhia phab ntau ntxiv.

• Tshooj 3: Tswj thiab txwv cov tibneeg phem tej kev nyiaj txiag.

• Tshooj 4: Tiv thaiv Amelikas li ciam teb.

• Tshooj 5: Ua kom muaj kev yoojyim rau cov tub ceevxwm txoj kev nrhiav cov tibneeg phem.

• Tshooj 6: Pab cov uas raug teebmeem los ntawm cov tibneeg phem, pab cov tub ceevxwm thiab pab lawv tsevneeg.

• Tshooj 7: Pub kom muaj kev sib koomtes ntau rau kev sib qhia txog kev tiv thaiv tej vajtse.

• Tshooj 8: Ua kom kev rau txim rau cov tibneeg phem ntau ntxiv.

• Tshooj 9: Txhim kho kom kev tiv thaiv haj yam zoo ntxiv.

• Tshooj 10: Thiab lwm yam

Raws li cov nqi lus uas hais nyob hauv tsabcai los saum no, kev uas Hmoob ua rog rau Amelikas nyob Lostsuas yog ua rog tubsab (terrorist). Vim li ntawd, tsabcai txwv tsis pub Hmoob ua neeg thojnam tuaj nyob Amelikas, tsis pub npav ntsuab rau Hmoob, thiab tsis pub Hmoob ua haivneeg Amelikas.

Yog ua raws li tsabcai no, qhia tias yuav nyuaj rau cov Hmoob uas nyob Thaibteb vim tias yuav txwv tsis pub Hmoob tuaj rau Amelikas, tuaj txog los yuav tsis pub npav ntsuab rau Hmoob, thiab yuav tsis pub Hmoob los ua haivneeg Amelikas.

Raws li xovxwm nyob ntawm KARE 11, Paul Rosenzweig, tus pab saib kev ruaj nres nyob Homeland Security hais tias lawv tseem tabtom nrhiav kev ua ib qho cai los mus daws Hmoob qhov teebmeem no thiab coj mus yuav kev pomzoo nyob Congress.

Lub koom haum qub tubrog, Lao Veterans of America, thiab Sen. Norm Coleman nyob Minnesota los kuj tseem npaj siab yuav pab hais kom tseemfwv Amelikas tsim ib qho cai los pub ib qho kev tshwjxeeb rau Hmoob, kom txhob muab tsabcai Patriot Act los siv rau Hmoob.

Tsab xovxwm KARE 11 tseem hais ntxiv tias ob peb hlis dhau los tseemfwv George W. Bush lawv kuj tau tso cai tshwjxeeb rau 8 pab tibneeg tau zam dhau tsabcai Patriot Act lawm, tabsis tsis muaj Hmoob npe nyob hauv.

Qhia tau tias muaj nomtswv Amelikas coob leej yuav pab Hmoob hais kom tsabcai Patriot Act no txhob siv raug rau Hmoob, tabsis qhov tseemceeb tshaj yog Hmoob yuav tau hais tiag tiag mas cov nomtswv Amelikas thiaj yuav kub siab hais thiab tseemfwv Amelikas thiab yuav ua ib qho cai tshwjxeeb rau Hmoob li uas twb ua rau 8 pab tibneeg lawm.