Hmoob nyob dej dawb txom-nyem heev tsis muaj kev vaam tom ntej

Muaj xov tshaj tawm thaum lub 9 hlis 21, 2006, hais tias peb tsoom Hmoob thojnam nyob lub zos Dej Dawb hauv Thaibteb hais tias xyov lawv lubneej tom ntej yuav mus zoo li cas. Vim tseemfwv Thaib tau tso cai kom pab tub saib kev tsuaj ntseg, Internal Security Operations Command (ISOC), cia li nrhiav kev xa 4,500 leej Hmoob nyob hauv lub zos Dej Dawb rov qab kom sai npaum li sai tau.

Tam sim no muaj kwvyees li 6,500 leej Hmoob nyob hauv lub yeej thojnam zos Dej Dawb. Nyob rau hauv 6,500 leej no muaj 4,500 leej yog cov uas nyuam qhuav khiav Lostsuasteb los. Feeb coob lawv them nqi ntiav cov tibneeg coj lawv kev los txog Thaibteb kwv yees li 6,000 rau 30,000 Npaj (Baht) nyiaj Thaib.

Hos muaj 2,000 leej mas yog cov uas khiav tawm hauv qhov tsua los, tom qab uas muab qhov tsua kawm thiab muab 15,000 leej xa mus nyob rau Amelikas xyoo 2005 lawm.Lub koom haum saib txog kev ncajncees rau tibneeg, Amnesty International, tau ceebtoom tawm hais tias yog tseem muab cov Hmoob no yuam xa rov qab mus rau Lostsuas mas lawv yuav raug tsim txom loj heev thiab tej zaum yuav raug tua.

Xws li thaum lub 12 hlis, nomtswv Thaib tau xa 26 leej menyuam Hmoob thiab ib tus laus rov qab rau Lostsuas uas tseem raug kaw yam tsis paub tias xyom lawv nyob qhov twg li lawm.

Cov Hmoob uas khiav tuaj rau Thaibteb, lawv hais tias vim lawv tus kheej losyog lawv cov kwvtij tau pab Amelikas cov tubrog CIA kev ua rog tub sab nyob Lostsuas txij xyoo 1961 txog 1975, mas lawv thiaj tau khiav tuaj vim raug kev tsim txom los ntawm tseemfwv kumusniv Lostsuas.

Tseemfwv Thaib kuv tau hais tias lawv npaj yuav xa 231 leeg Hmoob, feem coob yog menyuam yaus, uas lawv txhom tau ntawm ciam teb Thaib thiab Lostsuas thaum lub 6 hli rov qab sai sai. Tam sim no lawv tseem raug kaw nyob hauv 7 lub nkuaj hauv xeev Phetchabun yam txomnyem kawg.

Niaj hnub no tseemfwv Lostsuas, tseemfwv Thaib, thiab tseemfwv Amelikas lawv puav leej tsis kam txais yuav cov Hmoob no. Tseemfwv Lostsuas tsis kam lees tias cov Hmoob nyob zos Dej Dawb yog tibneeg Lostsuas. Lawv hais tias yog tibneeg Thaib xwb.

Tseemfwv Amelikas, tam sim no lawv tsis muaj lub homphiaj yuav txais cov Hmoob ntxiv tuaj rau Amelikas. Tseemfwv Thaib, lawv tsis kam txais cov Hmoob no nyob Thaibteb vim nws yuav ua rau Hmoob haj yam tuaj coob ntxiv xwb.

Niaj hnub no, tseemfwv Thaib tabtom tshuaj xyuas saib leej twg yog khiav hauv Lostsuas tuaj, leej twg yog khiav hauv Thaibteb los, thiab leej twg uas yog qub tubrog Amelikas CIA tiag uas npaj yuav mus rau Amelikas.

Teebmeem kev pab khoom noj rau cov Hmoob, mas nws nyuaj vim tseemfwv Thaib tsis kam lees paub tias cov Hmoob no yog neeg thojnam; lawv hais tias cov Hmoob no yog tibneeg nkag tebchaws tsis raug cai xwb. Nws ua rau lub Koom Haum Ntiajteb (UN) tsis muaj cuab kav yuav mus pab tau. Cov Hmoob yeej txomnyem khoomnoj kawg nkaus.

Niaj hnub no muaj ob lub koom haum NGOs thiaj li pab cov Hmoob xwb, tabsis lub hu ua Relief Logistics International (RLI) thiaj li muab nyiaj tuaj pab yuav khoom noj. Lawv pab 1 kislus txhuv rau ib tug tibneeg thiab kom txaus noj kav 7 txog 10 hnub, tabsis qhov tseeb nws kav 3 txog 4 hnub xwb. Dua li ces lawv mam mus nrhiav lawv noj xwb.

Tseemfwv Thaib tsis pub cov Hmoob ua lag luam hauv lub yeej thojnam, mas lawv tsis muaj hauv kev nrhiav nyiaj los pab. Muaj cov tibneeg tuaj muag khoom thiab, tabsis tam sim no, nomtswv Thaib tau txwv lawm. Hos cov txheeb ze xa nyiaj Amelikas los, los nomtswv Thaib kuj txwv lawm thiab.

Muaj ib tug nomtswv Thaib qib siab nyob hauv yeej thojnam Dej Dawb hais tias lawv tsis pab khoom noj rau cov Hmoob vim lawv pom tias cov Hmoob yog tibneeg txhaum cai. Mas lawv lub luag haujlwm yog tswj cov Hmoob kom txog thaum muab cov Hmoob xa rov qab xwb.

Muab soj ntsuam saib tib zoo lawm, thaum kawg tseemfwv Thaib yeej yuav coj cov Hmoob no mus nyob dua ib lub yeej thojbnam tshiab kom txog thaum nrhiav tau hauv kev xa rov qab rau Lostsuas. Niaj hnub no cov Hmoob kuj tawm mus tawm los tau, tabsis qhov chaw tshiab tej zaum yuav zoo li lub nkuaj.

Thaum lub 3 hlis nomtswv Thaib tau tsa muaj lub roojvag (checkpoint) tswj cov tibneeg tawm mus tawm los thiab txwv tsis pub tibneeg mus yees duab lawm.

Lub koom haum Medecins Sans Frontieres (MSF) ua cov pab tshuaj rau cov Hmoob nyob zos Dej Dawb tau hias tias vim tu ncua kev noj haus ua rau cov menyuam muaj mob yooj yim. Ib lim tiam twg lawv tshuaj xyuas txog 500 leej. Nyob hauv zos Dej Dawb muaj menyuam kwvyees 1,500 – 1,700 leej. Xyoo tas los muaj kwvyees 200 leej menyuam yug tshiab.